Mark 8

Yesu boda 'ihe'aidiya

(Madiu 15:32-39)

1Sauga nage 'oina boda madouna wete sihegogonama Yesu 'oina, ma geya 'adimo. Coinega 'ana tomuliyao 'ibwauwedima, ma 'ihegwaediya, 'igwae, 2“Tomota bewa ya'ate muyamuyaediya, weyahina sabwelo 'etoi 'ebwa ba'idadao tamiyamiya, ma geya 'adimo. 3Ceguma magomaledi yahesumanedi, tabu ma 'edai sihemwalomwalohana, weyahina tupwadi bwagebwagega sitauyama.”

4Eeta Yesu 'ana tomuliyaowedi sihegwaeya, sigwae, “Togidega tupwa yoho 'awawa 'oina tomotaedi bewa 'adi taloba 'ese?”

5Coinega Yesu 'ihesilalediya, 'igwae, “Hisa 'ami belediyao simiyamiya?” Ma sigwae, “Sebenimo.”

6Eeta boda 'iloinediya ma bale'uwa simiyatoiya. Simiyatoiya ma beledi sebeniyedi 'i'ewediya ma weyahidi 'iloyauwedowa Yehoba 'oina, ma 'i'ehisihisiya, 'i'ebwaediya 'ana tomuliyao 'oidiya, ma tomota si'ebwaediya, eema siheguyai sakowasiyeya.

7Ma wete tupwana silahana 'i'iudi simiyamiya, weyahidi Yesu 'igwae helauwa Yehoba 'oina, ma 'ana tomuliyaowedi 'iloinediya, ma siheguyaiyedi tomota 'oidiya.

8Coinega mabwaiyadi si'aiya ta simwausuwa, ma muliyetega 'e'ahai tupwatupwadi sidomweya ma kodo sebeni silohemahediya. 9Ma bodaedi 'adi baibaiwa gide powa tausani. Eeta 'ihewasa hilediya.

10Tuta nage 'oina 'ana tomuliyao ba'idanao 'idi waga sigeluwa ma sinaowa Dalimanuta tupwaina.

Palisiyao nuwanuwadi 'ila'ilala si'ita

11Eeta Palisiyao sinaoma, ma Yesu 'oina sihe'ohe'ohena, ma sitohoya ma 'abehega galewega 'ila'ilala 'ida he'itae 'oidiya. 12Ma Yesu ma'ina nuwagala 'ihegwaediya 'igwae, “Togidega ma 'oinega yaso bewa nuwanuwami 'ila'ilala, ma hesi geya 'eta wa'ita.” 13Coinega 'i'ebesinediya ma wagai 'igeluwa, ma sihabala hali tupwa.

Helodi ma Palisiyao 'idi he'ita gide beledi 'ana 'ebe 'abiheseseha

(Madiu 16:5-12)

14Ma hesi 'adi haite sinuwanaideya, ma beledi 'aigeda tuwa wagai 'itupwa. 15Ma Yesu 'ihemataluwediya, 'igwae, “Wa'ita Palisiyao* ma Helodi* 'adi beledi 'ana 'ebe 'abiheseseha 'oinega wa'ita yahigomi.”

16Coinega tomuliyaowedi siboidimo 'oidiya sigwaeya, “Yesu 'ina gwaeina lamuna weyahina 'ada haiteina tanuwanaideya.”

17Ma Yesu 'idi nuwatuhu 'isanapuya, 'oinega 'ihegwaediya, “To'aha weyahina wagwaegwae 'abehega geya 'ami haitemo? Beno geya weyahina taugu yagwaegwae. Togidega 'imi nuwatuhu si'elopota ma geya sawasawahina ma 'igu gwae lamuna wasanapu. 18Mamatami ma geya wa'ita, ma wete matenami ma geya wada hesagoha, 'oinega geya'abwa wanuwanuwa tuhuyahi 'igu paihowao boda 'adi he'ai weyahina, 'awa? 19Tutaina beledi nima 'oinega tomota paibi tausani yahe'aidiya hisa kodo 'ulaheya 'oidiyega wahegogonediya?” Ma sigwae “Tuwelo.”

20Ma Yesu 'ihenaida wete 'igwaeya, “Ma tutaina beledi sebeni 'oinega tomota powa tausani yahe'aidiya, ma hisa kodo 'ulaheya 'oidiyega wahegogoneya?” Ma sigwae, “Sebeni.” 21Coinega Yesu 'igwaeya, “Comi togidega ta geya nuwami 'ida sabwalena.”

Yesu tomata gibugibu 'i'abihe bwebwe'aneya

22Eeta Bedeseida 'oina sitauyama, ma loheya 'aigeda mata gibugibuina sitoeyama Yesu 'oina, si'ahwanoiyeya 'abehega 'i'abitoho ma 'ibwebwe'ana. 23Coinega Yesu tomata gibugibuina nimana 'oina 'i'abiya ma 'itoeya, 'asaina si'ebesineya. Ma Yesu loheyaina matana 'ihulasiya, ma nimanega matanaina 'i'abitohodiya, ma 'ihegwaeya, “Sawasawahina to'aha 'u'itadi?”

24Coinega loheyaina 'ilo'ita dadana ma 'igwaeya, “Tomota ya'itediya, ma 'adi 'ita gide tuwa 'aiwe si'e'elo yawala.”

25Ma wete Yesu loheyaina matana 'i'abitoho hilediya, ma 'i'ebubuna, eeta 'i'asilala bwaibwaina, ma ginaula mabwaiyadi 'i'itediya.

26Coinega Yesu 'ihewasaeya, 'igwae, “Geya'abwa 'uhilahila 'asa madouna 'oina, ma hesi 'utauya 'uboi 'ino hada.”

Pita 'ihepwaila Yesu weyahina

(Madiu 16:13-20; Luke 9:18-31)

27Ta Yesu ma'ana tomuliyao sinaonao Sisaliya Pilipai tupwaidi weyahidi ma 'edai 'ana tomuliyaowedi 'ihegwaediya, 'igwae, “Togidega tomota 'idi gwae weyahigu wahesagohediya 'abehega taiya taugu?”

28Ma tomuliyaowedi sigwae, “Tomota tupwadi sigwaeya 'abehega 'owa Yoni To'abihebabitaiso, ma wete tupwadi sigwae 'abehega 'owa Ilaitiya*, ma tupwadi sigwae 'abehega 'owa palopita nugenugetaina 'aigeda.”

29Coinega wete 'ihesilalediya, “Ma 'omi togidega 'imi nuwatuhu 'abehega taugu taiya?”

Eema Pita 'ihemaiseya 'igwae, “Cowa Keliso To'abihetenaina.”

30Ma Yesu 'iloina pa'alediya, 'igwae, “Geya sawasawahina 'eta taiya 'oina wahehepwailegau.”

Yesu 'ihepwaila 'ina muya ma 'ina 'amasa weyahidi

(Madiu 16:21-28; Luke 9:22-27)

31Ma Yesu 'ihe'ale 'ihe'ita 'oidiya to'aha 'abwa 'oina 'ilatu, ma 'igwaeya, “Taugu Loheyaiguina 'abwa muya madouna yaloba. Weyahina babada ta topwaoli madoudi ta loina 'ana tohe'itao 'abwa silogwahategau ma silohe'amasigau, ma sabwelo 'etoi mulina 'abwa yatoholo hila.”

32Yesu 'ina gwaeina bewa 'oinega 'ilagu hemasalaheya 'ina 'amasa weyahina. Coinega Pita Yesu 'itoeya, ma mahetena sinaowa hagana, ma Pitaina 'i'ausiya ma 'abehega ginauledi sahena silatulatu Yesu 'oina. 33Ma Yesu 'ihasakowasi ma 'ana tomuliyao 'i'e'ebubudiya, ma 'iheliya Pita 'oina, 'igwaeya, “Cowa Seitani, bewa sauga 'u'ebesinegau! Weyahina 'ino nuwatuhuwedi nuwatuhu 'asa gabulena 'ana nuwatuhu, ma hesi geya Yehoba 'ina nuwatuhu gide.”

34Coinega Yesu boda mabwaiyadi ma wete 'ana tomuliyao mahetediyao 'ibwau he'autedima, ma 'ihegwaediya, 'igwae, “Taiya 'eguma nuwanuwana ma 'imuliyegau, 'ilobwaineya ma 'iboi 'ina loina 'ilogwahate, ma 'aneyage 'iboi 'ana kelose 'i'ahali ma 'i'amasa, beno gide 'ana 'eda'eda, 'eguma taiya 'imuliyegau.”

35Ma hesiyage 'eguma taiya yawasina 'inuwahi, 'abwa yawasinaina 'ihe'wadalele. Ma 'eguma taiya weyahigu ma wasana bwebwe'ana weyahina yawasina 'itagwale ma 'i'amasa, tauna 'abwa yawasi moisa 'iloba. 36Ma 'eguma 'ida wasawasao bale'uwa madou hedadedi talobediya beno ginaula bwagabwaga, ma hesi ginaula madou hedada beno yawasida moisa. 37Weyahina 'eguma yawasida moisa tahe'wadalele, beno geya wete 'eta 'ana hemiyalae 'imiyamiya.

38“Ma 'eguma taiya 'owa weyahigu 'uhedeba mwadimwadina, wete 'igu he'itao weyahidi 'uhedeba mwadimwadina, ma 'uuhalegau yaso* bewa galadi ma ganaganawalidi matadiya, 'abwa taugu Loheyaiguina* wete yauhalego, tutaina Tamagu 'ina wasawasa maemaedanaina 'oinega yahilama ma aneloseyao wete ba'idagwao.”